كيف أوفر أموالي وأحافظ على صحتي من خلال التسوّق؟

by abbas01

قبل ما نشتري أيا شي من المحلات والأسواق لازم نحط ببالنا عدة نقط ندير بالنا عليها وقت نختار أيا منتج حتى نتجنب هدر أموالنا باختيارات منتجات ممكن ما تلزمنا بعد ما نشتريها..

لازم نتأكد كتير من اسم المنتج يلي بدنا نشتريه كون في كتير شركات بتقلد اسم وشكل المنتجات الأجنبية بشكل كتيير قريب وهالشي ممكن يخلينا ننخدع ونشتري شي ما بيلزمنا.

لازم ننتبه لتاريخ صلاحية المنتج وهالشي يلي لازم يصير بشكل عفوي لكل منتج حابين نشتريه.

لازم ننتبه أنو تكون المعلبات سليمة من أي ضرر أو عطب حتى ما يكون المنتج فاسد من جوا ونضطر نرمي العلبة.

ضروري نقرأ المكونات يلي داخلة بتحضير المنتج حتى نعرف شوفي مواد ممكن ما تكون خاطرة على بالنا أنها تكون موجودة وحتى نعرف إذا في مواد منتحسس منها.

مثلاً للأشخاص يلي معهم حساسية القمح كتير في منتجات بالنظرة الأولى مافيها منتجات قمح بس بالتدقيق بالمحتويات بكونو كاتبين قد تحتوي على القمح وهيك منتجنب وقوع مشكلة صحية.

لازم نقرأ تعليمات الاستخدام والتحضير والتخزين بعد الفتح وهالشي كتير مهم متل حليب الأطفال.

لازم ننتبه للعبارات التحذيرية الموجودة على العلب كمثال أن المنتج غير ملائم للحوامل أو المرضع أو الأطفال أو الرياضيين أثناء ممارستهم للرياضة. هي عبارات جداً مهمة ننتبه عليها.

طبعا في كتير أمور غير النقاط السابقة لازم ننتبه عليها بس هدول الأساسيات وحتى ما طول عليكم. حاولوا تتذكروا دائماً هي النقاط وقت تشتروا أيا منتج وإذا عندكم معلبات أو منتجات بالبيت جربوا تقرؤوها هلأ وإذا لقيتوا شيء مفاجئ ما كنتو تتوقعوا وجوده فرجونا بالتعليقات شو بتلاقوها وخلونا نستفاد كلنا سوا.

تبقوا بألف خير وصحة وعافية

إعداد وكتابة اختصاصي التغذية عباس ديروان

You may also like